teri shikast ka harba talash karte hain

tirī shikast kā harba talāsh karte haiñ

tujhe nahīñ tire jaisā talāsh karte haiñ

charāġh phuul shagūfa dhanak sitāra chāñd

ham ahl-e-zauq bhī kyā kyā talāsh karte haiñ

sunā hai jab se ki ḳhushiyoñ kā e.atibār nahīñ

ġhamoñ ko lamha-ba-lamha talāsh karte haiñ

haiñ ramz-e-azmat-e-tishna-labī se ham vāqif

ho pahra jis pe vo dariyā talāsh karte haiñ

vo jis ko dekh ke hiss-e-latīf jaag uThe

vahī badan vahī chehra talāsh karte haiñ

sukūt-e-zāt kā sannāTā ab shabāb pe hai

ham ek chāhne vaalā talāsh karte haiñ

vahī ki saaya thā jis kā na koī saanī thā

vo nuur nuur sarāpā talāsh karte haiñ

unheñ milī hai virāsat meñ sabr kī tahzīb

jo dard meñ hī mudāvā talāsh karte haiñ

teri shikast ka harba talash karte hain

tujhe nahin tere jaisa talash karte hain

charagh phul shagufa dhanak sitara chand

hum ahl-e-zauq bhi kya kya talash karte hain

suna hai jab se ki KHushiyon ka eatibar nahin

ghamon ko lamha-ba-lamha talash karte hain

hain ramz-e-azmat-e-tishna-labi se hum waqif

ho pahra jis pe wo dariya talash karte hain

wo jis ko dekh ke hiss-e-latif jag uThe

wahi badan wahi chehra talash karte hain

sukut-e-zat ka sannaTa ab shabab pe hai

hum ek chahne wala talash karte hain

wahi ki saya tha jis ka na koi sani tha

wo nur nur sarapa talash karte hain

unhen mili hai wirasat mein sabr ki tahzib

jo dard mein hi mudawa talash karte hain