teri talash mein bhaTka hun dar-ba-dar jaanan

tirī talāsh meñ bhaTkā huuñ dar-ba-dar jānāñ

maiñ tujh ko bhuul na pā.ūñgā umr bhar jānāñ

nahīñ hai tujh se kisī taur bhī mafar jānāñ

hai tū hī qātil-e-dil tū hī chārāgar jānāñ

mirī talāsh mirī aarzū mirī chāhat

tirā jamāl tirā qurb-e-mo'atabar jānāñ

ye āñkheñ tere hī jalvoñ kī haiñ amiiñ be-shak

ye dil hai terī mohabbat kā mustaqar jānāñ

nazar meñ tū hai ḳhayāloñ meñ tū hai dil meñ tū

maiñ kab huā tirī jānib se be-ḳhabar jānāñ

tirī hī yaad ne mahkā.e merī ruuh meñ zaḳhm

tire sabab se hai ḳhushbū kā ye safar jānāñ

hasīn yādoñ kā ik silsila thā TuuT gayā

fazā meñ gūñjā jab āvāza-e-gajar jānāñ

teri talash mein bhaTka hun dar-ba-dar jaanan

main tujh ko bhul na paunga umr bhar jaanan

nahin hai tujh se kisi taur bhi mafar jaanan

hai tu hi qatil-e-dil tu hi chaaragar jaanan

meri talash meri aarzu meri chahat

tera jamal tera qurb-e-mo'atabar jaanan

ye aankhen tere hi jalwon ki hain amin be-shak

ye dil hai teri mohabbat ka mustaqar jaanan

nazar mein tu hai KHayalon mein tu hai dil mein tu

main kab hua teri jaanib se be-KHabar jaanan

teri hi yaad ne mahkae meri ruh mein zaKHm

tere sabab se hai KHushbu ka ye safar jaanan

hasin yaadon ka ek silsila tha TuT gaya

faza mein gunja jab aawaza-e-gajar jaanan