teri talash mein hai saeban bhi hum bhi

tirī talāsh meñ hai sā.ebān bhī ham bhī

hamāre saath hamārī thakān bhī ham bhī

falak ko chhūne kī ḳhvāhish hazār dil meñ liye

ki sargirāñ hai hamārī uḌaan bhī ham bhī

hai intizār meñ barsoñ se rahnumāoñ ke

hamārī manzil-e-jāñ kā nishān bhī ham bhī

vahī hai nok-e-sinān-e-sitam-garān-e-jahāñ

vahī hai karb-o-balā imtihān bhī ham bhī

isī kā naam liye jā.eñge qayāmat tak

hamāre saath rahegī azaan bhī ham bhī

talāsh-e-manzil-e-hastī meñ ik zamāna huā

bhaTakte phirte haiñ sab kārvān bhī ham bhī

isī purānī kahānī pe ham jiye jaa.eñ

vahī havāle vahī dāstān bhī ham bhī

'nabīl' roz-e-azal se the jaise vaise haiñ

sitamgaroñ ke sitam haiñ lagān bhī ham bhī

teri talash mein hai saeban bhi hum bhi

hamare sath hamari thakan bhi hum bhi

falak ko chhune ki KHwahish hazar dil mein liye

ki sargiran hai hamari uDan bhi hum bhi

hai intizar mein barson se rahnumaon ke

hamari manzil-e-jaan ka nishan bhi hum bhi

wahi hai nok-e-sinan-e-sitam-garan-e-jahan

wahi hai karb-o-bala imtihan bhi hum bhi

isi ka nam liye jaenge qayamat tak

hamare sath rahegi azan bhi hum bhi

talash-e-manzil-e-hasti mein ek zamana hua

bhaTakte phirte hain sab karwan bhi hum bhi

isi purani kahani pe hum jiye jaen

wahi hawale wahi dastan bhi hum bhi

'nabil' roz-e-azal se the jaise waise hain

sitamgaron ke sitam hain lagan bhi hum bhi