teri talab ne falak pe sab ke safar ka anjam likh diya hai

tirī talab ne falak pe sab ke safar kā anjām likh diyā hai

kisī ko najm-e-sahar kisī ko sitāra-e-shām likh diyā hai

zabāñ pe harf-e-malāl kyuuñ ho ki ham haiñ raazī tirī razā par

tirā karam tū ne āb-o-dāna agar tah-e-dām likh diyā hai

bachā ke apne liye na rakkhā koī garebāñ kā taar ham ne

junūñ se jo kuchh bhī ham ne paayā vo sab tire naam likh diyā hai

nigāh bāzār par nahīñ thī vagarna kyuuñ chāra-sāz-e-ġham ne

marīz ke nusḳha-e-shifā meñ ḳhulūs kā jaam likh diyā hai

ye kis ke ḳhāme kā hai navishta ki bul-havas aish kar rahe haiñ

nasīb-e-ahl-e-nazar meñ kis ne hujūm-e-ālām likh diyā hai

jahān-e-harf-o-sadā meñ charchā na kyuuñ ho 'gulzār' ḳhaas terā

tire liye terī ḳhush-navā.ī ne shohra-e-ām likh diyā hai

teri talab ne falak pe sab ke safar ka anjam likh diya hai

kisi ko najm-e-sahar kisi ko sitara-e-sham likh diya hai

zaban pe harf-e-malal kyun ho ki hum hain raazi teri raza par

tera karam tu ne aab-o-dana agar tah-e-dam likh diya hai

bacha ke apne liye na rakkha koi gareban ka tar hum ne

junun se jo kuchh bhi hum ne paya wo sab tere nam likh diya hai

nigah bazar par nahin thi wagarna kyun chaara-saz-e-gham ne

mariz ke nusKHa-e-shifa mein KHulus ka jam likh diya hai

ye kis ke KHame ka hai nawishta ki bul-hawas aish kar rahe hain

nasib-e-ahl-e-nazar mein kis ne hujum-e-alam likh diya hai

jahan-e-harf-o-sada mein charcha na kyun ho 'gulzar' KHas tera

tere liye teri KHush-nawai ne shohra-e-am likh diya hai