teri yaaden hain dil mein phir bhi virani si rahti hai

tirī yādeñ haiñ dil meñ phir bhī vīrānī sī rahtī hai

ḳhudā jaane ajab lāhaq pareshānī sī rahtī hai

badan par laakh kapḌe hoñ magar phir bhī barahna hai

agar insāñ ke zehn-o-dil meñ uryānī sī rahtī hai

yahī achchhā hai insāñ ke liye insāñ kā dil rakhnā

dukhāne se kisī kā dil pashemānī sī rahtī hai

ḳhirad-mandī zamāne meñ ajab e.ajāz rakhtī hai

maiñ jab bhī sochtā huuñ ghanToñ hairānī sī rahtī hai

maiñ tanhā huuñ magar ehsās-e-tanhā.ī nahīñ mujh ko

ki dil meñ ek sūrat jānī-pahchānī sī rahtī hai

kabhī ai kaash vo mil jaa.e mujh ko aisā ho jaa.e

tamanna mere dil meñ ek anjānī sī rahtī hai

mujhe 'shahzād' terī dostī se Dar sā lagtā hai

tirī āñkhoñ meñ poshīda jo nādānī sī rahtī hai

teri yaaden hain dil mein phir bhi virani si rahti hai

KHuda jaane ajab lahaq pareshani si rahti hai

badan par lakh kapDe hon magar phir bhi barahna hai

agar insan ke zehn-o-dil mein uryani si rahti hai

yahi achchha hai insan ke liye insan ka dil rakhna

dukhane se kisi ka dil pashemani si rahti hai

KHirad-mandi zamane mein ajab eajaz rakhti hai

main jab bhi sochta hun ghanTon hairani si rahti hai

main tanha hun magar ehsas-e-tanhai nahin mujh ko

ki dil mein ek surat jaani-pahchani si rahti hai

kabhi ai kash wo mil jae mujh ko aisa ho jae

tamanna mere dil mein ek anjaani si rahti hai

mujhe 'shahzad' teri dosti se Dar sa lagta hai

teri aankhon mein poshida jo nadani si rahti hai