teri yaadon ka pahra ho gaya hai

tirī yādoñ kā pahra ho gayā hai

zehen meñ phir saverā ho gayā hai

mirī jaañ ye to merāj-e-vafā hai

ki terā 'aks merā ho gayā hai

mirī pahchān saarī miT chukī hai

ye chehra kis kā chehra ho gayā hai

na jaane aaj kyā biitī falak par

samundar surḳh gahrā ho gayā hai

nahīñ milte haiñ mere dast-o-pā tak

ye kaisā ghup añdherā ho gayā hai

farishtoñ saare aivānoñ meñ kah do

ki is jogī kā pherā ho gayā hai

'nasīm-ajmal' ḳhalāoñ meñ nikal jā

ki jīvan ek gherā ho gayā hai

teri yaadon ka pahra ho gaya hai

zehen mein phir sawera ho gaya hai

meri jaan ye to meraj-e-wafa hai

ki tera 'aks mera ho gaya hai

meri pahchan sari miT chuki hai

ye chehra kis ka chehra ho gaya hai

na jaane aaj kya biti falak par

samundar surKH gahra ho gaya hai

nahin milte hain mere dast-o-pa tak

ye kaisa ghup andhera ho gaya hai

farishton sare aiwanon mein kah do

ki is jogi ka phera ho gaya hai

'nasim-ajmal' KHalaon mein nikal ja

ki jiwan ek ghera ho gaya hai