tishnagi tapti hawaon se bujhate dekha

tishnagī taptī havāoñ se bujhāte dekhā

phir use ret ke dariyā meñ nahāte dekhā

koī mausam ho alāmat thā vo shādābī kī

dar-ba-dar aaj use ḳhaak uḌāte dekhā

apnī muTThī meñ dabā.e thā vo sadiyāñ lekin

sar ko ik lamhe ke āñchal meñ chhupāte dekhā

kaise kaise dur-e-nāyāb mile miTTī meñ

mauj-dar-mauj use ashk bahāte dekhā

dasht-e-ummīd meñ har-chand vo tanhā thā magar

be-tahāsha use āvāz lagāte dekhā

aur phir toḌ diyā us ne ta.alluq kā hisār

vo akelā thā jahāñ tak use jaate dekhā

tishnagi tapti hawaon se bujhate dekha

phir use ret ke dariya mein nahate dekha

koi mausam ho alamat tha wo shadabi ki

dar-ba-dar aaj use KHak uDate dekha

apni muTThi mein dabae tha wo sadiyan lekin

sar ko ek lamhe ke aanchal mein chhupate dekha

kaise kaise dur-e-nayab mile miTTi mein

mauj-dar-mauj use ashk bahate dekha

dasht-e-ummid mein har-chand wo tanha tha magar

be-tahasha use aawaz lagate dekha

aur phir toD diya us ne talluq ka hisar

wo akela tha jahan tak use jate dekha