to kya gar wo dilon mein faslon ko chhoD jate hain

to kyā gar vo diloñ meñ fāsloñ ko chhoḌ jaate haiñ

sabhī gāhak hī TuuTe ā.inoñ ko chhoḌ jaate haiñ

hamāre kahne pe is jang meñ kuchh bhī nahīñ ruktā

tumhāre kahne pe dushman safoñ ko chhoḌ jaate haiñ

mujhe patjhaḌ ke mausam ne sikhāyā hijr kā matlab

ki kaise sūkhe patte Tahniyoñ ko chhoḌ jaate haiñ

na.e shahroñ meñ bachchoñ ke liye ghar lete haiñ māñ-bāp

vahī bachche baḌe ho kar gharoñ ko chhoḌ jaate haiñ

khilaune paane kī nākām hasrat se bhare bachche

chale jaate haiñ meloñ se diloñ ko chhoḌ jaate haiñ

purānī yādoñ ke bāġhīche ko jab yaad karte haiñ

vo kāñTe biin lete haiñ guloñ ko chhoḌ jaate haiñ

to kya gar wo dilon mein faslon ko chhoD jate hain

sabhi gahak hi TuTe aainon ko chhoD jate hain

hamare kahne pe is jang mein kuchh bhi nahin rukta

tumhaare kahne pe dushman safon ko chhoD jate hain

mujhe patjhaD ke mausam ne sikhaya hijr ka matlab

ki kaise sukhe patte Tahniyon ko chhoD jate hain

nae shahron mein bachchon ke liye ghar lete hain man-bap

wahi bachche baDe ho kar gharon ko chhoD jate hain

khilaune pane ki nakaam hasrat se bhare bachche

chale jate hain melon se dilon ko chhoD jate hain

purani yaadon ke baghiche ko jab yaad karte hain

wo kanTe bin lete hain gulon ko chhoD jate hain