to phir kya rah-e-hasti mein koi nazuk maqam aaya

to phir kyā rāh-e-hastī meñ koī nāzuk maqām aayā

zabāñ par aaj ye be-sāḳhta kyoñ un kā naam aayā

kahāñ tak ehtiyāt-e-sajda hotī rāh-e-ulfat meñ

kahīñ tūr-e-nazar aayā kahīñ dil kā maqām aayā

judā maqsad judā mashrab judā rāheñ judā manzil

na duniyā mere kaam aa.ī na maiñ duniyā ke kaam aayā

karishma-sāzī-e-fikr-o-nazar kā pūchhnā kyā hai

tulū-e-sub.h se pahle mujhe paiġhām-e-shām aayā

jahāñ par phuul khilte the vahāñ kāñTe hue paidā

ye kis ke dast-e-qudrat meñ gulistāñ kā nizām aayā

ḳhudā mālūm vo haiñ yā hai nairañgī tasavvur kī

nazar ke sāmne ik paikar-e-husn-e-tamām aayā

hayāt-o-maut ko ye kashmakash dekhī nahīñ jaatī

ajal is samt aa.ī us taraf un kā payām aayā

'ḳhalish' fitrat kī gul-afshāniyāñ mere hī dam tak thiiñ

na phir koī naved aa.ī na phir koī payām aayā

to phir kya rah-e-hasti mein koi nazuk maqam aaya

zaban par aaj ye be-saKHta kyon un ka nam aaya

kahan tak ehtiyat-e-sajda hoti rah-e-ulfat mein

kahin tur-e-nazar aaya kahin dil ka maqam aaya

juda maqsad juda mashrab juda rahen juda manzil

na duniya mere kaam aai na main duniya ke kaam aaya

karishma-sazi-e-fikr-o-nazar ka puchhna kya hai

tulu-e-subh se pahle mujhe paigham-e-sham aaya

jahan par phul khilte the wahan kanTe hue paida

ye kis ke dast-e-qudrat mein gulistan ka nizam aaya

KHuda malum wo hain ya hai nairangi tasawwur ki

nazar ke samne ek paikar-e-husn-e-tamam aaya

hayat-o-maut ko ye kashmakash dekhi nahin jati

ajal is samt aai us taraf un ka payam aaya

'KHalish' fitrat ki gul-afshaniyan mere hi dam tak thin

na phir koi nawed aai na phir koi payam aaya