toD di zanjir rishton ki parae shahr mein

toḌ dī zanjīr rishtoñ kī parā.e shahr meñ

baat sadiyoñ kī na lamhoñ kī parā.e shahr meñ

ek hī shiddat ke jhoñke se bikhar ke rah ga.ī

zindagī thī kachche dhāgoñ kī parā.e shahr meñ

dost thā koī na dushman hī ki samjhātā mujhe

be-bahā hai khoj ḳhushiyoñ kī parā.e shahr meñ

mah-ruḳhoñ zohra-jabīnoñ kī na ab pariyoñ kī baat

har taraf hai misl hūroñ kī parā.e shahr meñ

sab hī jhūTī shān-o-shaukat ke nashe meñ chuur haiñ

kis ko hotī qadr jazboñ kī parā.e shahr meñ

phūl-ghar ham ne banāne ko kahā thā aur vo

rakh gayā buniyād kāñToñ kī parā.e shahr meñ

sang jo bhī jis jagah dekhā use paikar diyā

ye 'ibādat maiñ ne barsoñ kī parā.e shahr meñ

ajnabī shāḳhoñ pe baiThe the jab aa.e lauT kar

merī hālat thī parindoñ kī parā.e shahr meñ

fāsle tai kar ke 'īraj' aa gayā huuñ dasht se

phir na yaad aa.ī ġhazāloñ kī parā.e shahr meñ

toD di zanjir rishton ki parae shahr mein

baat sadiyon ki na lamhon ki parae shahr mein

ek hi shiddat ke jhonke se bikhar ke rah gai

zindagi thi kachche dhagon ki parae shahr mein

dost tha koi na dushman hi ki samjhata mujhe

be-baha hai khoj KHushiyon ki parae shahr mein

mah-ruKHon zohra-jabinon ki na ab pariyon ki baat

har taraf hai misl huron ki parae shahr mein

sab hi jhuTi shan-o-shaukat ke nashe mein chur hain

kis ko hoti qadr jazbon ki parae shahr mein

phul-ghar hum ne banane ko kaha tha aur wo

rakh gaya buniyaad kanTon ki parae shahr mein

sang jo bhi jis jagah dekha use paikar diya

ye 'ibaadat main ne barson ki parae shahr mein

ajnabi shaKHon pe baiThe the jab aae lauT kar

meri haalat thi parindon ki parae shahr mein

fasle tai kar ke 'iraj' aa gaya hun dasht se

phir na yaad aai ghazalon ki parae shahr mein