tohfa-e-gham bhi mila dard ki saughat ke baad

tohfa-e-ġham bhī milā dard kī sauġhāt ke ba.ad

phir bhī dil ḳhush na huā itnī ināyāt ke ba.ad

umr-bhar DhūñDte phirte hī rahe apnā vajūd

ḳhud se ham mil na sake un se mulāqāt ke ba.ad

maiñ huuñ jab tak to samajh lījiye sab kuchh hai yahāñ

kuchh na rah jā.egā duniyā meñ mirī zaat ke ba.ad

kitnī tārīkiyāñ guzrīñ to ujālā dekhā

husn aayā hai nazar kitne hijābāt ke ba.ad

zindagī terī tavāzo.a bhī maiñ kartā lekin

na bachā kuchh bhī lahū ġham kī mudārāt ke ba.ad

haath aa.e hue lamhāt na chhoḌo varna

kuchh na haath aa.egā guzre hue lamhāt ke ba.ad

aa.egā daur-e-masarrat bhī yaqīnan 'fāzil'

kyā nahīñ hotī hai duniyā meñ sahar raat ke ba.ad

tohfa-e-gham bhi mila dard ki saughat ke baad

phir bhi dil KHush na hua itni inayat ke baad

umr-bhar DhunDte phirte hi rahe apna wajud

KHud se hum mil na sake un se mulaqat ke baad

main hun jab tak to samajh lijiye sab kuchh hai yahan

kuchh na rah jaega duniya mein meri zat ke baad

kitni tarikiyan guzrin to ujala dekha

husn aaya hai nazar kitne hijabaat ke baad

zindagi teri tawazoa bhi main karta lekin

na bacha kuchh bhi lahu gham ki mudaraat ke baad

hath aae hue lamhat na chhoDo warna

kuchh na hath aaega guzre hue lamhat ke baad

aaega daur-e-masarrat bhi yaqinan 'fazil'

kya nahin hoti hai duniya mein sahar raat ke baad