tujhko hi sochta rahun fursat nahin rahi

tujh ko hī sochtā rahūñ fursat nahīñ rahī

aur phir vo pahle vaalī tabī.at nahīñ rahī

tujh se bichhaḌ ke zinda rahā to pata chalā

ab is qadar bhī terī zarūrat nahīñ rahī

maiñ sard ho gayā huuñ ki ab tere lams meñ

guzrī rutoñ kī ātishīñ hiddat nahīñ rahī

āḳhir ko tere ġham bhī mujhe raas aa ga.e

shām-e-firāq meñ bhī vo shiddat nahīñ rahī

mujh ko pata chalā to maiñ hairān rah gayā

ham saath haiñ magar vo rifāqat nahīñ rahī

vo hichkiyoñ se rotā rahā aur maiñ chup rahā

shāyad ye sach hai mujh ko mohabbat nahīñ rahī

tujh ko hi sochta rahun fursat nahin rahi

aur phir wo pahle wali tabiat nahin rahi

tujh se bichhaD ke zinda raha to pata chala

ab is qadar bhi teri zarurat nahin rahi

main sard ho gaya hun ki ab tere lams mein

guzri ruton ki aatishin hiddat nahin rahi

aaKHir ko tere gham bhi mujhe ras aa gae

sham-e-firaq mein bhi wo shiddat nahin rahi

mujh ko pata chala to main hairan rah gaya

hum sath hain magar wo rifaqat nahin rahi

wo hichkiyon se rota raha aur main chup raha

shayad ye sach hai mujh ko mohabbat nahin rahi