tujhko ye wahm hai ki wo teri nazar mein hain

tujh ko ye vahm hai ki vo terī nazar meñ haiñ

tūfān barq-o-bād parinde shajar meñ haiñ

shāyad kabhī hamārī zarūrat paḌe tujhe

ab tak isī ḳhayāl se ham rahguzar meñ haiñ

sohbat bhī ahl-e-ilm kī kartī hai sarbuland

ham be-hunar haiñ halqa-e-ahl-e-hunar meñ haiñ

jhuk jaa.e vo jabīñ to hamesha jhukī rahe

kuchh aisī lazzateñ bhī mire sang-e-dar meñ haiñ

shīshe ke ghar bhī apnī jagah ḳhush-numā sahī

lekin jo rāhateñ mire miTTī ke ghar meñ haiñ

mahfil tamām jin kī nazar par hai multafit

'nāsir' hameñ hai faḳhr ki un kī nazar meñ haiñ

tujh ko ye wahm hai ki wo teri nazar mein hain

tufan barq-o-baad parinde shajar mein hain

shayad kabhi hamari zarurat paDe tujhe

ab tak isi KHayal se hum rahguzar mein hain

sohbat bhi ahl-e-ilm ki karti hai sarbuland

hum be-hunar hain halqa-e-ahl-e-hunar mein hain

jhuk jae wo jabin to hamesha jhuki rahe

kuchh aisi lazzaten bhi mere sang-e-dar mein hain

shishe ke ghar bhi apni jagah KHush-numa sahi

lekin jo rahaten mere miTTi ke ghar mein hain

mahfil tamam jin ki nazar par hai multafit

'nasir' hamein hai faKHr ki un ki nazar mein hain