tujhse bichhDun to ye KHadsha hai akela ho jaun

tujh se bichhḌūñ to ye ḳhadsha hai akelā ho jā.ūñ

ghor tanhā.ī ke jañgal kā maiñ hissa ho jā.ūñ

ik tire dam se hī shādāb hai ye merā vajūd

tū nazar pher le mujh se to maiñ sahrā ho jā.ūñ

dil kī dīvāroñ pe marqūm rahe naam mirā

qabl is ke ki maiñ bhūlā huā qissa ho jā.ūñ

tū agar dil meñ basā le to banūñ maiñ shā.ir

tū jo hoñToñ pe sajā le to maiñ naġhma ho jā.ūñ

aisā ho jaa.e na sūjhe tujhe kuchh mere sivā

aisā ho jaa.e ki maiñ hī tirī duniyā ho jā.ūñ

jāntā huuñ maiñ tirī surma.ī āñkhoñ kā tilism

ik nazar mujh pe bhī maiñ bhī tire jaisā ho jā.ūñ

maiñ adhūrā huuñ bahut tujh se bichhaḌ kar ai dost

tū jo mil jaa.e dobāra to maiñ saarā ho jā.ūñ

tujh se bichhDun to ye KHadsha hai akela ho jaun

ghor tanhai ke jangal ka main hissa ho jaun

ek tere dam se hi shadab hai ye mera wajud

tu nazar pher le mujh se to main sahra ho jaun

dil ki diwaron pe marqum rahe nam mera

qabl is ke ki main bhula hua qissa ho jaun

tu agar dil mein basa le to banun main shair

tu jo honTon pe saja le to main naghma ho jaun

aisa ho jae na sujhe tujhe kuchh mere siwa

aisa ho jae ki main hi teri duniya ho jaun

jaanta hun main teri surmai aankhon ka tilism

ek nazar mujh pe bhi main bhi tere jaisa ho jaun

main adhura hun bahut tujh se bichhaD kar ai dost

tu jo mil jae dobara to main sara ho jaun