tujhse daman-kashan nahin hun main

tujh se dāman-kashāñ nahīñ huuñ maiñ

ai zamīñ āsmāñ nahīñ huuñ maiñ

kārvāñ mere ba.ad aa.egā

gard huuñ kārvāñ nahīñ huuñ maiñ

phail saktā huuñ chhā nahīñ saktā

raushnī huuñ dhuāñ nahīñ huuñ maiñ

naaz hai mujh pe mere saane ko

zahmat-e-rā.egāñ nahīñ huuñ maiñ

juzv huuñ ek jāvedāñ kul kā

haañ agar jāvedāñ nahīñ huuñ maiñ

apnī taqdīr par yaqīn nahīñ

aap se bad-gumāñ nahīñ huuñ maiñ

dar-o-bast-e-chaman ko kyā jānūñ

phuul huuñ bāġhbāñ nahīñ huuñ maiñ

zindagī par bahār hai mujh se

zindagī kī ḳhizāñ nahīñ huuñ maiñ

yā nigāh-e-talab huuñ yā jalva

parda-e-darmiyāñ nahīñ huuñ maiñ

sochne dījiye ma.āl-e-vafā

aap se sargirāñ nahīñ huuñ maiñ

maut se chheḌ-chhāḌ jaarī hai

ziist kā nauha-ḳhvāñ nahīñ huuñ maiñ

āshiyāñ kyā banā.ūñ gulshan meñ

qābil-e-āshiyāñ nahīñ huuñ maiñ

ai ġham-e-sabr-āzmā sun le

qābil-e-imtihāñ nahīñ huuñ maiñ

yūsufoñ kā hai kārvāñ mire saath

yūsuf-e-kārvāñ nahīñ huuñ maiñ

maiñ 'sabā' aah bhī nahīñ kartā

āshnā-e-fuġhāñ nahīñ huuñ maiñ

tujh se daman-kashan nahin hun main

ai zamin aasman nahin hun main

karwan mere baad aaega

gard hun karwan nahin hun main

phail sakta hun chha nahin sakta

raushni hun dhuan nahin hun main

naz hai mujh pe mere sane ko

zahmat-e-raegan nahin hun main

juzw hun ek jawedan kul ka

han agar jawedan nahin hun main

apni taqdir par yaqin nahin

aap se bad-guman nahin hun main

dar-o-bast-e-chaman ko kya jaanun

phul hun baghban nahin hun main

zindagi par bahaar hai mujh se

zindagi ki KHizan nahin hun main

ya nigah-e-talab hun ya jalwa

parda-e-darmiyan nahin hun main

sochne dijiye maal-e-wafa

aap se sargiran nahin hun main

maut se chheD-chhaD jari hai

zist ka nauha-KHwan nahin hun main

aashiyan kya banaun gulshan mein

qabil-e-ashiyan nahin hun main

ai gham-e-sabr-azma sun le

qabil-e-imtihan nahin hun main

yusufon ka hai karwan mere sath

yusuf-e-karwan nahin hun main

main 'saba' aah bhi nahin karta

aashna-e-fughan nahin hun main