tujhse jo kuchh tha zara sa wasta wo bhi gaya

tujh se jo kuchh thā zarā sā vāsta vo bhī gayā

naam hī ko jo thā qaa.em rābta vo bhī gayā

samt gum thī rāste kī be-nishāñ thiiñ manzileñ

lamha lamha saath thā jo qāfila vo bhī gayā

āsmāñ kī vus.atoñ meñ diip the jalte hue

thā tasavvur meñ nayā ik rāsta vo bhī gayā

dostoñ meñ dushmanoñ ko dekh kar hairāñ huuñ maiñ

aage baḌh jaane kā thā jo valvala vo bhī gayā

vasl kā bhī raaz rastoñ ke kaThin hone meñ hai

shāyad ab dushvār thā jo fāsla vo bhī gayā

soch kī uljhan sulajhtī jā rahī hai dam-ba-dam

gum-shuda manzil kā thā jo vasvasa vo bhī gayā

is qadar nazdīk paayā dil ne jab apnā habīb

ab talak qaa.em rahā jo hausla vo bhī gayā

tujh se jo kuchh tha zara sa wasta wo bhi gaya

nam hi ko jo tha qaem rabta wo bhi gaya

samt gum thi raste ki be-nishan thin manzilen

lamha lamha sath tha jo qafila wo bhi gaya

aasman ki wusaton mein dip the jalte hue

tha tasawwur mein naya ek rasta wo bhi gaya

doston mein dushmanon ko dekh kar hairan hun main

aage baDh jaane ka tha jo walwala wo bhi gaya

wasl ka bhi raaz raston ke kaThin hone mein hai

shayad ab dushwar tha jo fasla wo bhi gaya

soch ki uljhan sulajhti ja rahi hai dam-ba-dam

gum-shuda manzil ka tha jo waswasa wo bhi gaya

is qadar nazdik paya dil ne jab apna habib

ab talak qaem raha jo hausla wo bhi gaya