tujhse nazar mila kar diwana ho gaya main

tujh se nazar milā kar dīvāna ho gayā maiñ

kuchh raaz ban gayā kuchh afsāna ho gayā maiñ

apne liye bahāyā ḳhūn-e-jigar to kyā ġham

tere liye to rangīñ afsāna ho gayā maiñ

haañ ab uThā rahe ho dīvāna-vār nazreñ

jab tum se tang aa kar dīvāna ho gayā maiñ

ye soch kar ki shāyad parvāna-vār aao

afsurda sā charāġh-e-ġham-ḳhāna ho gayā maiñ

haT kar ġhamoñ se aksar Thukrā diyā ġhamoñ ko

aksar ġhamoñ se ghuT kar dīvāna ho gayā maiñ

terī nazar meñ rah kar ik raaz ban gayā thā

gir kar tirī nazar se afsāna ho gayā maiñ

ik baar aur dekhā hasrat se un kī jānib

phir rafta rafta un se begāna ho gayā maiñ

ab to mirī ḳhamoshī sab kah chukī hai tum se

ab to sunā-sunāyā afsāna ho gayā maiñ

hai kaal āñsuoñ kā kyuuñ chashm-e-ġham meñ 'jazbī'

kis riñd-e-tishna-lab kā paimāna ho gayā maiñ

tujh se nazar mila kar diwana ho gaya main

kuchh raaz ban gaya kuchh afsana ho gaya main

apne liye bahaya KHun-e-jigar to kya gham

tere liye to rangin afsana ho gaya main

han ab uTha rahe ho diwana-war nazren

jab tum se tang aa kar diwana ho gaya main

ye soch kar ki shayad parwana-war aao

afsurda sa charagh-e-gham-KHana ho gaya main

haT kar ghamon se aksar Thukra diya ghamon ko

aksar ghamon se ghuT kar diwana ho gaya main

teri nazar mein rah kar ek raaz ban gaya tha

gir kar teri nazar se afsana ho gaya main

ek bar aur dekha hasrat se un ki jaanib

phir rafta rafta un se begana ho gaya main

ab to meri KHamoshi sab kah chuki hai tum se

ab to suna-sunaya afsana ho gaya main

hai kal aansuon ka kyun chashm-e-gham mein 'jazbi'

kis rind-e-tishna-lab ka paimana ho gaya main