tujhse qarib-tar teri tanhaiyon mein hun

tujh se qarīb-tar tirī tanhā.iyoñ meñ huuñ

dhaḌkan huuñ tere qalb kī gahrā.iyoñ meñ huuñ

dukh hai ki terī zaat meñ shāmil thā maiñ kabhī

aur aaj tere jism kī parchhā.iyoñ meñ huuñ

ḳhud-bīñ na ban baġhaur zarā aa.ina to dekh

maiñ bhī to tere husn kī ra.anā.iyoñ meñ huuñ

laTkā huuñ maiñ salīb pe har ahd kī tarah

is jurm par ki vaqt kī sachchā.iyoñ meñ huuñ

jab se girā huuñ us kī nigāhoñ se ai 'zafar'

har bazm meñ haqīr huuñ rusvā.iyoñ meñ huuñ

tujh se qarib-tar teri tanhaiyon mein hun

dhaDkan hun tere qalb ki gahraiyon mein hun

dukh hai ki teri zat mein shamil tha main kabhi

aur aaj tere jism ki parchhaiyon mein hun

KHud-bin na ban baghaur zara aaina to dekh

main bhi to tere husn ki ranaiyon mein hun

laTka hun main salib pe har ahd ki tarah

is jurm par ki waqt ki sachchaiyon mein hun

jab se gira hun us ki nigahon se ai 'zafar'

har bazm mein haqir hun ruswaiyon mein hun