tujhe dil se utara hi nahin tha

tujhe dil se utārā hī nahīñ thā

ki tere bin guzāra hī nahīñ thā

hameñ bhī zindagī mushkil lagī thī

ye aalam bas tumhārā hī nahīñ thā

palaT ke aa bhī saktā thā vo lekin

use ham ne pukārā hī nahīñ thā

tire lahje meñ tabdīlī che ma.anī

tirī jānib ishāra hī nahīñ thā

use ilzām dharnā thā kisī par

ki koī aur chāra hī nahīñ thā

ye sadma yuuñ bhī mushkil hai ki pahle

kabhī maiñ ḳhud se haarā hī nahīñ thā

kaTe haiñ vo bhī lamhe zindagī se

jinheñ ham ne guzāra hī nahīñ thā

bahut āsān ho saktī thiiñ rāheñ

hameñ chalnā gavāra hī nahīñ thā

mohabbat par ye vaqt aanā thā 'anvar'

koī sadqa utārā hī nahīñ thā

tujhe dil se utara hi nahin tha

ki tere bin guzara hi nahin tha

hamein bhi zindagi mushkil lagi thi

ye aalam bas tumhaara hi nahin tha

palaT ke aa bhi sakta tha wo lekin

use hum ne pukara hi nahin tha

tere lahje mein tabdili che mani

teri jaanib ishaara hi nahin tha

use ilzam dharna tha kisi par

ki koi aur chaara hi nahin tha

ye sadma yun bhi mushkil hai ki pahle

kabhi main KHud se haara hi nahin tha

kaTe hain wo bhi lamhe zindagi se

jinhen hum ne guzara hi nahin tha

bahut aasan ho sakti thin rahen

hamein chalna gawara hi nahin tha

mohabbat par ye waqt aana tha 'anwar'

koi sadqa utara hi nahin tha