tujhe hi shauq tujhe hi talab pukarta hun

tujhe hī shauq tujhe hī talab pukārtā huuñ

maiñ tere naam ko ab be-sabab pukārtā huuñ

tū ās-pās nahīñ hotā hai agar mere

yaqīn kar maiñ tujhe zer-e-lab pukārtā huuñ

sarāpā ram hai kisī qais kā mire bhītar

maiñ apne jism ko dasht-e-‘arab pukārtā huuñ

tavīl raat ke 'ālam meñ aaj bhī tanhā

jo naam yaad haiñ mujh ko vo sab pukārtā huuñ

pukār saktā huuñ kāfir ke naam se tujh ko

magar tū dekh ki maiñ tujh ko rab pukārtā huuñ

ḳhalā ke paar se āvāz lauT aatī hai

khulī fazā meñ kahīñ 'kāf' jab pukārtā huuñ

tujhe hi shauq tujhe hi talab pukarta hun

main tere nam ko ab be-sabab pukarta hun

tu aas-pas nahin hota hai agar mere

yaqin kar main tujhe zer-e-lab pukarta hun

sarapa ram hai kisi qais ka mere bhitar

main apne jism ko dasht-e-‘arab pukarta hun

tawil raat ke 'alam mein aaj bhi tanha

jo nam yaad hain mujh ko wo sab pukarta hun

pukar sakta hun kafir ke nam se tujh ko

magar tu dekh ki main tujh ko rab pukarta hun

KHala ke par se aawaz lauT aati hai

khuli faza mein kahin 'kaf' jab pukarta hun