tujhe ishq jaur-o-jafa se hai tera kaam jud-o-saKHa nahin

tujhe ishq jaur-o-jafā se hai tirā kaam jūd-o-saḳhā nahīñ

mujhe sirf is kā malāl hai tujhe pās-e-ahd-e-vafā nahīñ

maiñ kisī kā banda-e-zar nahīñ maiñ kisī ke dar pe jhukā nahīñ

tire mā-sivā do-jahān meñ mirā aur koī ḳhudā nahīñ

abhī hosh aaya hai ham-nashīñ abhī dil ko chain milā nahīñ

zarā kah do fasl-e-bahār se abhī chāk-e-dāmāñ siyā nahīñ

chalīñ laakh āñdhiyāñ zulm kī uThe laakh tūfāñ haiñ jabr ke

jo lahū se ham ne jalā diyā vo charāġh ab bhī bujhā nahīñ

baḌī kaif-āvar haiñ lazzateñ tirī yaad kī tire hijr kī

jo maza hai shām-e-firāq meñ shab-e-vasl meñ vo maza nahīñ

haiñ ye ahl-e-qāfila nā-samajh ye samajh meñ aatā hai ham-nashīñ

use mīr-e-kārvāñ chun liyā jise aap apnā pata nahīñ

vo zarūr ā.eñge ek din vo zarūr ā.eñge bil-yaqīñ

tū kisī kī haañ pe yaqīn na kar ye 'girāmī' dil kī sadā nahīñ

tujhe ishq jaur-o-jafa se hai tera kaam jud-o-saKHa nahin

mujhe sirf is ka malal hai tujhe pas-e-ahd-e-wafa nahin

main kisi ka banda-e-zar nahin main kisi ke dar pe jhuka nahin

tere ma-siwa do-jahan mein mera aur koi KHuda nahin

abhi hosh aaya hai ham-nashin abhi dil ko chain mila nahin

zara kah do fasl-e-bahaar se abhi chaak-e-daman siya nahin

chalin lakh aandhiyan zulm ki uThe lakh tufan hain jabr ke

jo lahu se hum ne jala diya wo charagh ab bhi bujha nahin

baDi kaif-awar hain lazzaten teri yaad ki tere hijr ki

jo maza hai sham-e-firaq mein shab-e-wasl mein wo maza nahin

hain ye ahl-e-qafila na-samajh ye samajh mein aata hai ham-nashin

use mir-e-karwan chun liya jise aap apna pata nahin

wo zarur aaenge ek din wo zarur aaenge bil-yaqin

tu kisi ki han pe yaqin na kar ye 'girami' dil ki sada nahin