tujhe jawedan bana de wo iram qubul kar le

tujhe jāvedāñ banā de vo iram qubūl kar le

mirā mashvara hai tujh ko koī ġham qubūl kar le

ba-kamāl-e-azm-e-rāsiḳh tū sitam qubūl kar le

kabhī daar tak ga.e the vo qadam qubūl kar le

ka.ī aur tishna-lab haiñ tirī anjuman meñ saaqī

maiñ vo bul-havas nahīñ huuñ jo karam qubūl kar le

rah-o-rasm-e-āshiqī meñ jo vafā ke naam par hoñ

dil-e-be-qarār hañs kar vo sitam qubūl kar le

vo ho ka.aba yā ki mandir tū ġharaz na rakh kisī se

tujhe aadmī banā de vo haram qubūl kar le

ye sujūd-e-ārifāna baḌe kaam ke haiñ lekin

vahī sajda be-ḳhatā hai jo sanam qubūl kar le

vo kabhī sharāratan bhī jo atā kareñ to 'bāsit'

ba-kamāl-e-dil-barāna tū sitam qubūl kar le

tujhe jawedan bana de wo iram qubul kar le

mera mashwara hai tujh ko koi gham qubul kar le

ba-kamal-e-azm-e-rasiKH tu sitam qubul kar le

kabhi dar tak gae the wo qadam qubul kar le

kai aur tishna-lab hain teri anjuman mein saqi

main wo bul-hawas nahin hun jo karam qubul kar le

rah-o-rasm-e-ashiqi mein jo wafa ke nam par hon

dil-e-be-qarar hans kar wo sitam qubul kar le

wo ho kaba ya ki mandir tu gharaz na rakh kisi se

tujhe aadmi bana de wo haram qubul kar le

ye sujud-e-arifana baDe kaam ke hain lekin

wahi sajda be-KHata hai jo sanam qubul kar le

wo kabhi shararatan bhi jo ata karen to 'basit'

ba-kamal-e-dil-barana tu sitam qubul kar le