tujhe kis tarah chhuDaun KHalish-e-gham-e-nihan se

tujhe kis tarah chhuḌā.ūñ ḳhalish-e-ġham-e-nihāñ se

dil-e-be-qarār lā.ūñ unheñ DhūñDh kar kahāñ se

vo bahār kaash aa.e vo chale havā-e-dil-kash

ki qafas pe phuul barseñ mirī shāḳh-e-āshiyāñ se

kabhī qāfile se aage kabhī qāfile se pīchhe

na maiñ kārvāñ meñ shāmil na judā huuñ kārvāñ se

mire baa'd kī bahāreñ mirī yādgār hoñgī

ki khileñge phuul aksar mirī ḳhāk-e-rā.egāñ se

abhī muskurā rahī thiiñ mirī aarzū kī kaliyāñ

mujhe le chalā muqaddar sū-e-dām āshiyāñ se

jo jabīñ meñ thā amānat mirā shauq-e-jubba-sā.ī

vo lipaT ke rah gayā hai tire sañg-e-āstāñ se

milī lamha-bhar bhī fursat na 'fazā'-e-ġham-zada ko

vo baras rahe haiñ fitne shab-o-roz āsmāñ se

tujhe kis tarah chhuDaun KHalish-e-gham-e-nihan se

dil-e-be-qarar laun unhen DhunDh kar kahan se

wo bahaar kash aae wo chale hawa-e-dil-kash

ki qafas pe phul barsen meri shaKH-e-ashiyan se

kabhi qafile se aage kabhi qafile se pichhe

na main karwan mein shamil na juda hun karwan se

mere ba'd ki bahaaren meri yaadgar hongi

ki khilenge phul aksar meri KHak-e-raegan se

abhi muskura rahi thin meri aarzu ki kaliyan

mujhe le chala muqaddar su-e-dam aashiyan se

jo jabin mein tha amanat mera shauq-e-jubba-sai

wo lipaT ke rah gaya hai tere sang-e-astan se

mili lamha-bhar bhi fursat na 'faza'-e-gham-zada ko

wo baras rahe hain fitne shab-o-roz aasman se