tujhe kya naseha ahbab KHud samjhae jate hain

tujhe kyā nāsehā ahbāb ḳhud samjhā.e jaate haiñ

idhar tū khaa.e jaatā hai udhar vo khaa.e jaate haiñ

chaman vāloñ se jā kar ai nasīm-e-sub.h kah denā

asīrān-e-qafas ke aaj par kaTvā.e jaate haiñ

kahīñ beḌī aTaktī hai kahīñ zanjīr ulajhtī hai

baḌī mushkil se dīvāne tire dafnā.e jaate haiñ

unheñ ġhairoñ ke ghar dekhā hai aur inkār hai un ko

maiñ bāteñ pī rahā huuñ aur vo qasmeñ khaa.e jaate haiñ

ḳhudā mahfūz rakkhe nāla-hā-e-shām-e-furqat se

zamīñ bhī kāñptī hai āsmāñ tharrā.e jaate haiñ

koī dam ashk thamte hī nahīñ aisā bhī kyā ronā

'qamar' do-chār din kī baat hai vo aa.e jaate haiñ

tujhe kya naseha ahbab KHud samjhae jate hain

idhar tu khae jata hai udhar wo khae jate hain

chaman walon se ja kar ai nasim-e-subh kah dena

asiran-e-qafas ke aaj par kaTwae jate hain

kahin beDi aTakti hai kahin zanjir ulajhti hai

baDi mushkil se diwane tere dafnae jate hain

unhen ghairon ke ghar dekha hai aur inkar hai un ko

main baaten pi raha hun aur wo qasmen khae jate hain

KHuda mahfuz rakkhe nala-ha-e-sham-e-furqat se

zamin bhi kanpti hai aasman tharrae jate hain

koi dam ashk thamte hi nahin aisa bhi kya rona

'qamar' do-chaar din ki baat hai wo aae jate hain