tujhe maine pa ke jo kho diya ye mere nasib ki chaal hai

tujhe maiñ ne pā ke jo kho diyā ye mire nasīb kī chaal hai

mire chāra-gar tujhe kyā ḳhabar ki bichhaḌnā kitnā muhāl hai

kisī ġhair se mirī ḳhairiyat tirā pūchhnā bhī to kam nahīñ

mujhe ye yaqīn to ho gayā tujhe ab bhī merā ḳhayāl hai

uThe zalzale chalīñ āñdhiyāñ ye charāġh phir bhī nahīñ bujhā

ye karam nahīñ kisī aur kā tirī rahmatoñ kā kamāl hai

hai ajiib moḌ pe zindagī na to ġham rahā na ḳhushī rahī

na ġhurūr hai na surūr hai na uruuj hai na zavāl hai

tirī bevafā.ī bhulā to duuñ magar is ḳhayāl kā kyā karūñ

mire bas meñ kuchh bhī nahīñ rahā mire dil ke shīshe meñ baal hai

kahīñ titliyoñ kā pata nahīñ ki parinda koī bachā nahīñ

vahī phuul haiñ vahī ḳhaar haiñ vahī peḌ hai vahī Daal hai

vo bichhaḌ ke jiine kā faisla to mujhe bujhā ke chalā gayā

na yaqīn hai na gumān hai na mire laboñ pe savāl hai

yahāñ har taraf haiñ numā.isheñ na diloñ kā chain na rāhateñ

na vo sādgī na vo dil-kashī na vo husn hai na jamāl hai

na vo ḳhvāb āñkhoñ meñ ūñghte na vo raat jagne ke silsile

na vo jañgaloñ kī kahāniyāñ na vo vahshatoñ kā ġhazāl hai

tujhe main ne pa ke jo kho diya ye mere nasib ki chaal hai

mere chaara-gar tujhe kya KHabar ki bichhaDna kitna muhaal hai

kisi ghair se meri KHairiyat tera puchhna bhi to kam nahin

mujhe ye yaqin to ho gaya tujhe ab bhi mera KHayal hai

uThe zalzale chalin aandhiyan ye charagh phir bhi nahin bujha

ye karam nahin kisi aur ka teri rahmaton ka kamal hai

hai ajib moD pe zindagi na to gham raha na KHushi rahi

na ghurur hai na surur hai na uruj hai na zawal hai

teri bewafai bhula to dun magar is KHayal ka kya karun

mere bas mein kuchh bhi nahin raha mere dil ke shishe mein baal hai

kahin titliyon ka pata nahin ki parinda koi bacha nahin

wahi phul hain wahi KHar hain wahi peD hai wahi Dal hai

wo bichhaD ke jine ka faisla to mujhe bujha ke chala gaya

na yaqin hai na guman hai na mere labon pe sawal hai

yahan har taraf hain numaishen na dilon ka chain na rahaten

na wo sadgi na wo dil-kashi na wo husn hai na jamal hai

na wo KHwab aankhon mein unghte na wo raat jagne ke silsile

na wo jangalon ki kahaniyan na wo wahshaton ka ghazal hai