tujhe rab kahe koi wahguru tu kahin KHuda kahin ram hai

tujhe rab kahe koī vahgurū tū kahīñ ḳhudā kahīñ raam hai

ye haiñ ek naam kī barkateñ hameñ naam lene se kaam hai

tirī ma.arifat kī sharāb meñ vo surūr-o-kaif-e-davām hai

mai-e-talḳh meñ bhalā kyā maza mai-e-talḳh piinā harām hai

hai harām kyā to halāl kyā ye hamāre dil pe hai munhasir

jise chāhe dil to halāl hai jo na chāhe dil to harām hai

mire dil meñ terī hī yaad hai tū basā huā hai ḳhayāl meñ

hai zabāñ pe terī hī guftugū mire lab pe terā hī naam hai

vo kisī bhī qaum kā bhaa.ī ho karo koshisheñ ki bhalā.ī ho

kisī baat pe na laḌā.ī ho yahī ambiyā kā payām hai

tirī bārgāh-e-niyāz meñ pa.e sajda saiñkaḌoñ sar jhukeñ

tū rahīm hai tū karīm hai tū hī sab kā pesh-imām hai

vo faqīr ho ki amiir ho ki ho bādshāh mire ḳhudā

ho kisī kā koī bhī martaba yahāñ jo hai terā ġhulām hai

vo karīm hai vo rahīm hai vo fahīm hai vahī kibriyā

bas usī kī shaan aziim hai bas usī kā aalī maqām hai

ai 'nahīf' tujh ko maiñ kyā kahūñ tujhe dil se kaise bhulā sakūñ

tirī sīdhī saadī sī guftugū tirā sīdhā saadā kalām hai

tujhe rab kahe koi wahguru tu kahin KHuda kahin ram hai

ye hain ek nam ki barkaten hamein nam lene se kaam hai

teri marifat ki sharab mein wo surur-o-kaif-e-dawam hai

mai-e-talKH mein bhala kya maza mai-e-talKH pina haram hai

hai haram kya to halal kya ye hamare dil pe hai munhasir

jise chahe dil to halal hai jo na chahe dil to haram hai

mere dil mein teri hi yaad hai tu basa hua hai KHayal mein

hai zaban pe teri hi guftugu mere lab pe tera hi nam hai

wo kisi bhi qaum ka bhai ho karo koshishen ki bhalai ho

kisi baat pe na laDai ho yahi ambiya ka payam hai

teri bargah-e-niyaz mein pae sajda sainkaDon sar jhuken

tu rahim hai tu karim hai tu hi sab ka pesh-imam hai

wo faqir ho ki amir ho ki ho baadshah mere KHuda

ho kisi ka koi bhi martaba yahan jo hai tera ghulam hai

wo karim hai wo rahim hai wo fahim hai wahi kibriya

bas usi ki shan azim hai bas usi ka aali maqam hai

ai 'nahif' tujh ko main kya kahun tujhe dil se kaise bhula sakun

teri sidhi sadi si guftugu tera sidha sada kalam hai