tujhe talash kisi kamsin-o-hasin ki bas

tujhe talāsh kisī kamsin-o-hasīn kī bas

use hai paisa kamātī huī machine kī bas

qarīb laa.e vo lab ashk mere piine ko

Dakait lūTne aa.e haiñ zā.erīn kī bus

jab apne gaañv meñ utrūñ to shaam utrī ho

maiñ saarī 'umr pakaḌtā rahā huuñ tiin kī bus

har ek shaḳhs hai āzād koī jabr nahīñ

ye ek baat bhī kaafī hai mere diin kī bas

maiñ apne kaam usī ke sipurd kartā huuñ

mujhe ḳhudā se tavaqqo' hai behtarīn kī bas

hameñ ye vahm thā aise hī 'umr sañvregī

shikan sañvārī hai ham ne tirī jabīn kī bas

ye log saḳht haqīqat-pasand hote haiñ

sunūñgā baat mohabbat ke munkirīn kī bas

use maiñ apnī vafā kā subūt kyā detā

ye saarī baat to hotī nahīñ yaqīn kī bas

tamāshā-gāh kī raunaq usī ke dam se hai

sunī ga.ī hai hamesha tamāshbīn kī bas

dil ek ghar thā ise maqbara banāyā gayā

ye aarzū thī kisī āḳhirī makīn kī bas

tujhe talash kisi kamsin-o-hasin ki bas

use hai paisa kamati hui machine ki bas

qarib lae wo lab ashk mere pine ko

Dakait luTne aae hain zaerin ki bus

jab apne ganw mein utrun to sham utri ho

main sari 'umr pakaDta raha hun tin ki bus

har ek shaKHs hai aazad koi jabr nahin

ye ek baat bhi kafi hai mere din ki bas

main apne kaam usi ke sipurd karta hun

mujhe KHuda se tawaqqo' hai behtarin ki bas

hamein ye wahm tha aise hi 'umr sanwregi

shikan sanwari hai hum ne teri jabin ki bas

ye log saKHt haqiqat-pasand hote hain

sununga baat mohabbat ke munkirin ki bas

use main apni wafa ka subut kya deta

ye sari baat to hoti nahin yaqin ki bas

tamasha-gah ki raunaq usi ke dam se hai

suni gai hai hamesha tamashbin ki bas

dil ek ghar tha ise maqbara banaya gaya

ye aarzu thi kisi aaKHiri makin ki bas