Tuk aankh milate hi kiya kaam hamara

Tuk aañkh milāte hī kiyā kaam hamārā

tis par ye ġhazab pūchhte ho naam hamārā

tum ne to nahīñ ḳhair ye farmā.iye baare

phir kin ne liyā rāhat-o-ārām hamārā

maiñ ne jo kahā aa.iye mujh paas to bole

kyuuñ kis liye kis vāste kyā kaam hamārā

rakhte haiñ kahīñ paañv to paḌte haiñ kahīñ aur

saaqī tū zarā haath to le thaam hamārā

Tuk dekh idhar ġhaur kar insāf ye hai vaah

ho jurm o gunah ġhair se aur naam hamārā

ai bād-e-sabā mahfil-e-ahbāb meñ kahiyo

dekhā hai jo kuchh haal tah-e-dām hamārā

gar vaqt-e-sahar jā.iye hotā hai ye irshād

hai vaqt-e-mulāqāt sar-e-shām hamārā

phir shaam ko aa.e to kahā sub.h ko yūñhī

rahtā hai sadā aap par ilzām hamārā

sar-gashtagi-e-marhala-e-shauq meñ ai ishq

paḌtā hai na.ī vaz.a se har gaam hamārā

ai barhamn-e-dair mohabbat meñ sanam kī

allāh hī baaqī rakhe islām hamārā

ham kūcha-e-dildār ke hote haiñ tasadduq

ai sheḳh-e-haram hai yahī ehrām hamārā

betābi-e-dil ke sabab us shoḳh tak 'inshā'

pahuñche hai bilā vāsta paiġhām hamārā

Tuk aankh milate hi kiya kaam hamara

tis par ye ghazab puchhte ho nam hamara

tum ne to nahin KHair ye farmaiye bare

phir kin ne liya rahat-o-aram hamara

main ne jo kaha aaiye mujh pas to bole

kyun kis liye kis waste kya kaam hamara

rakhte hain kahin panw to paDte hain kahin aur

saqi tu zara hath to le tham hamara

Tuk dekh idhar ghaur kar insaf ye hai wah

ho jurm o gunah ghair se aur nam hamara

ai baad-e-saba mahfil-e-ahbab mein kahiyo

dekha hai jo kuchh haal tah-e-dam hamara

gar waqt-e-sahar jaiye hota hai ye irshad

hai waqt-e-mulaqat sar-e-sham hamara

phir sham ko aae to kaha subh ko yunhi

rahta hai sada aap par ilzam hamara

sar-gashtagi-e-marhala-e-shauq mein ai ishq

paDta hai nai waza se har gam hamara

ai barhamn-e-dair mohabbat mein sanam ki

allah hi baqi rakhe islam hamara

hum kucha-e-dildar ke hote hain tasadduq

ai sheKH-e-haram hai yahi ehram hamara

betabi-e-dil ke sabab us shoKH tak 'insha'

pahunche hai bila wasta paigham hamara