TukDe TukDe mera daman-e-shakebai hai

TukḌe TukḌe mirā dāmān-e-shakebā.ī hai

kis qadar sabr-shikan aap kī añgḌā.ī hai

dil ne jazbāt-e-mohabbat se ziyā paa.ī hai

merī tanhā.ī bhī ik anjuman-ārā.ī hai

ab jafā se bhī gurezāñ haiñ vo allāh allāh

dekhiye kyā mirā anjām-e-shakebā.ī hai

bijliyāñ mere qafas par na kahīñ TuuT paḌeñ

kyuuñ sabā ḳhaak nasheman kī yahāñ laa.ī hai

bas vahī bahr-e-mohabbat kā shanāvar niklā

jis ne tūfāñ se ulajhne kī qasam khaa.ī hai

shauq se aap zamāne ko navāzeñ lekin

kyā koī merī tarah aap kā shaidā.ī hai

kaun hamdard zamāne meñ hai 'iqbāl' magar

un kī ik yaad faqat monis-e-tanhā.ī hai

TukDe TukDe mera daman-e-shakebai hai

kis qadar sabr-shikan aap ki angDai hai

dil ne jazbaat-e-mohabbat se ziya pai hai

meri tanhai bhi ek anjuman-arai hai

ab jafa se bhi gurezan hain wo allah allah

dekhiye kya mera anjam-e-shakebai hai

bijliyan mere qafas par na kahin TuT paDen

kyun saba KHak nasheman ki yahan lai hai

bas wahi bahr-e-mohabbat ka shanawar nikla

jis ne tufan se ulajhne ki qasam khai hai

shauq se aap zamane ko nawazen lekin

kya koi meri tarah aap ka shaidai hai

kaun hamdard zamane mein hai 'iqbaal' magar

un ki ek yaad faqat monis-e-tanhai hai