tum aa gae ho to phir tum se kuchh gila kya hai

tum aa ga.e ho to phir tum se kuchh gila kyā hai

tumhārā roz ye vā'doñ kā silsila kyā hai

ḳhabar nahīñ thī ki ham ko bhī Duub marnā thā

tumhāre 'ishq meñ itnī kaḌī sazā kyā hai

tumhārī aag meñ jal kar baḌā maza aayā

hamāre dil kī ab is ke sivā davā kyā hai

vo kyoñ chalī hai samundar meñ Duub marne ko

koī to rok ke pūchho use huā kyā hai

isī saḌak se to har roz tum guzarte ho

hamīñ se be-ruḳhī itnī tumheñ huā kyā hai

añdherā ghar kā hamārā nasīb hai 'afsar'

hamāre dil ko ujāloñ se vāsta kyā hai

tum aa gae ho to phir tum se kuchh gila kya hai

tumhaara roz ye wa'don ka silsila kya hai

KHabar nahin thi ki hum ko bhi Dub marna tha

tumhaare 'ishq mein itni kaDi saza kya hai

tumhaari aag mein jal kar baDa maza aaya

hamare dil ki ab is ke siwa dawa kya hai

wo kyon chali hai samundar mein Dub marne ko

koi to rok ke puchho use hua kya hai

isi saDak se to har roz tum guzarte ho

hamin se be-ruKHi itni tumhein hua kya hai

andhera ghar ka hamara nasib hai 'afsar'

hamare dil ko ujalon se wasta kya hai