tum apne aap par ehsan kyun nahin karte

tum apne aap par ehsān kyuuñ nahīñ karte

kiyā hai ishq to elaan kyuuñ nahīñ karte

sajā.e phirte ho mahfil na jaane kis kis kī

kabhī parindoñ ko mehmān kyuuñ nahīñ karte

vo dekhte hī nahīñ jo hai manzaroñ se alag

kabhī nigāh ko hairān kyuuñ nahīñ karte

purānī samtoñ meñ chalne kī sab ko aadat hai

na.ī dishāoñ kā vo dhyān kyuuñ nahīñ karte

bas ik charāġh ke bujhne se bujh ga.e 'dānish'

tum āñdhiy.oñ ko pareshān kyuuñ nahīñ karte

tum apne aap par ehsan kyun nahin karte

kiya hai ishq to elan kyun nahin karte

sajae phirte ho mahfil na jaane kis kis ki

kabhi parindon ko mehman kyun nahin karte

wo dekhte hi nahin jo hai manzaron se alag

kabhi nigah ko hairan kyun nahin karte

purani samton mein chalne ki sab ko aadat hai

nai dishaon ka wo dhyan kyun nahin karte

bas ek charagh ke bujhne se bujh gae 'danish'

tum aandhiyon ko pareshan kyun nahin karte