tum apne sath meri chashm-e-tar bhi le jao

tum apne saath mirī chashm-e-tar bhī le jaao

safar tavīl hai ik ham-safar bhī le jaao

nazar meñ raunaq-e-dīvār-o-dar bhī le jaao

ye kyā ki dasht-navardī meñ ghar bhī le jaao

in āñdhiy.oñ meñ bharosa hī kyā charāġhoñ kā

sajā ke apnī hathelī pe sar bhī le jaao

tum apnī raat sajāo na.e ujāloñ se

hamārā kyā hai hamārā sahar bhī le jaao

mileñge zaḳhm bahut zindagī ke mele meñ

tum apne saath hamārā jigar bhī le jaao

maiñ ek raah kā patthar sahī magar logo

kabhī mujhe kisī aazar ke ghar bhī le jaao

tumhāre haath kī ḳhushbū zarūr mahkegī

hamārī ḳhaak se koī sharar bhī le jaao

maiñ zindagī ke añdheroñ kā dard sah lūñgā

tum apnī yaad ke shams-o-qamar bhī le jaao

maiñ 'badr' ḳhud hī masīhā huuñ apne zaḳhmoñ kā

ye jurm hai to mujhe daar par bhī le jaao

tum apne sath meri chashm-e-tar bhi le jao

safar tawil hai ek ham-safar bhi le jao

nazar mein raunaq-e-diwar-o-dar bhi le jao

ye kya ki dasht-nawardi mein ghar bhi le jao

in aandhiyon mein bharosa hi kya charaghon ka

saja ke apni hatheli pe sar bhi le jao

tum apni raat sajao nae ujalon se

hamara kya hai hamara sahar bhi le jao

milenge zaKHm bahut zindagi ke mele mein

tum apne sath hamara jigar bhi le jao

main ek rah ka patthar sahi magar logo

kabhi mujhe kisi aazar ke ghar bhi le jao

tumhaare hath ki KHushbu zarur mahkegi

hamari KHak se koi sharar bhi le jao

main zindagi ke andheron ka dard sah lunga

tum apni yaad ke shams-o-qamar bhi le jao

main 'badr' KHud hi masiha hun apne zaKHmon ka

ye jurm hai to mujhe dar par bhi le jao