tum apni zaban Khaali kar ke ai nukta-waro pachhtaoge

tum apnī zabāñ ḳhālī kar ke ai nukta-varo pachhtāoge

maiñ ḳhuub samajhtā huuñ us ko jo baat mujhe samjhāoge

ik maiñ hī nahīñ huuñ tum jis ko jhūTā kah kar bach jāoge

duniyā tumheñ qātil kahtī hai kis ko kis ko jhuTlāoge

yā rāhat-e-dil ban kar aao yā āfat-e-dil ban kar aao!

pahchān hī lūñgā maiñ tum ko jis bhes meñ bhī tum aaoge

har baat bisāt-e-ālam meñ mānind-e-sadā-e-gumbad hai

auroñ ko burā kahne vaalo tum ḳhud bhī bure kahlāoge

phir chain na pāoge 'aḳhtar' is dard kī maarī duniyā meñ

is dar se agar uTh jāoge dar, dar kī Thokar khāoge

tum apni zaban KHali kar ke ai nukta-waro pachhtaoge

main KHub samajhta hun us ko jo baat mujhe samjhaoge

ek main hi nahin hun tum jis ko jhuTa kah kar bach jaoge

duniya tumhein qatil kahti hai kis ko kis ko jhuTlaoge

ya rahat-e-dil ban kar aao ya aafat-e-dil ban kar aao!

pahchan hi lunga main tum ko jis bhes mein bhi tum aaoge

har baat bisat-e-alam mein manind-e-sada-e-gumbad hai

auron ko bura kahne walo tum KHud bhi bure kahlaoge

phir chain na paoge 'aKHtar' is dard ki mari duniya mein

is dar se agar uTh jaoge dar, dar ki Thokar khaoge