tum ata-kesh ho raazi-ba-raza hain hum bhi

tum atā-kesh ho rāzī-ba-razā haiñ ham bhī

ishq-parvar hue tum ahl-e-vafā haiñ ham bhī

chāhe kitnā hī vo mahbūb thā kitnā hī aziiz

tum ḳhafā jis se hue us se ḳhafā haiñ ham bhī

chāhe kitnā hī vo mabġhūz rahā ho pahle

jo fidā tum pe huā us pe fidā haiñ ham bhī

tum ne ye lāla-o-gul kī jo sajā.ī mahfil

usī mahfil meñ to bulbul kī sadā haiñ ham bhī

jin ke sajdoñ ne hazāroñ ko banāyā ma.abūd

vo ye kahte haiñ ki logoñ ke ḳhudā haiñ ham bhī

laakh changezoñ kī tajdīd-e-jafā ho tum log

laakh mazlūmoñ ke sīnoñ kī duā haiñ ham bhī

tujh se bas ishq kiyā varna ḳhunāmī the na chor

kyā tamāshā hai ki dar-ḳhurd-e-sazā haiñ ham bhī

tum jo manzil ho to haiñ ham bhī nishān-e-manzil

tum jo qibla ho to haañ qibla-numā haiñ ham bhī

tum ata-kesh ho raazi-ba-raza hain hum bhi

ishq-parwar hue tum ahl-e-wafa hain hum bhi

chahe kitna hi wo mahbub tha kitna hi aziz

tum KHafa jis se hue us se KHafa hain hum bhi

chahe kitna hi wo mabghuz raha ho pahle

jo fida tum pe hua us pe fida hain hum bhi

tum ne ye lala-o-gul ki jo sajai mahfil

usi mahfil mein to bulbul ki sada hain hum bhi

jin ke sajdon ne hazaron ko banaya mabud

wo ye kahte hain ki logon ke KHuda hain hum bhi

lakh changezon ki tajdid-e-jafa ho tum log

lakh mazlumon ke sinon ki dua hain hum bhi

tujh se bas ishq kiya warna KHunami the na chor

kya tamasha hai ki dar-KHurd-e-saza hain hum bhi

tum jo manzil ho to hain hum bhi nishan-e-manzil

tum jo qibla ho to han qibla-numa hain hum bhi