tum bankpan ye apna dikhate ho hum ko kya

tum bāñkpan ye apnā dikhāte ho ham ko kyā

qabze pe haath rakh ke Darāte ho ham ko kyā

āñkheñ tumhārī jhapkīñ haiñ īdhar ko beshtar

tum in ishāratoñ se bulāte ho ham ko kyā

aaveñ hamārī gor meñ gar munkar-o-nakīr

itnā kaheñ abhī se uThāte ho ham ko kyā

lā kar kabhī diyā hai koī phuul phal hameñ

tum sair-e-gulsitāñ ko jo jaate ho ham ko kyā

kahte ho ek-ādh kī hai mere hāthoñ maut

ham bhī samajhte haiñ ye sunāte ho ham ko kyā

ham se to ab talak vahī sharm-o-hijāb hai

gar har kisī ke sāmne aate ho ham ko kyā

kahte ho roz ham se yahī kal ko aa.iyo

kyā ḳhū nikālī hai ye satāte ho ham ko kyā

denā hai koī bosa to de Dāliye miyāñ

kyuuñ paañv toḌte ho phirāte ho ham ko kyā

le le ke naam us kī jafāoñ kā 'mus.hafī'

ham aap jal rahe haiñ jalāte ho ham ko kyā

tum bankpan ye apna dikhate ho hum ko kya

qabze pe hath rakh ke Daraate ho hum ko kya

aankhen tumhaari jhapkin hain idhar ko beshtar

tum in ishaaraton se bulate ho hum ko kya

aawen hamari gor mein gar munkar-o-nakir

itna kahen abhi se uThate ho hum ko kya

la kar kabhi diya hai koi phul phal hamein

tum sair-e-gulsitan ko jo jate ho hum ko kya

kahte ho ek-adh ki hai mere hathon maut

hum bhi samajhte hain ye sunate ho hum ko kya

hum se to ab talak wahi sharm-o-hijab hai

gar har kisi ke samne aate ho hum ko kya

kahte ho roz hum se yahi kal ko aaiyo

kya KHu nikali hai ye satate ho hum ko kya

dena hai koi bosa to de Daliye miyan

kyun panw toDte ho phiraate ho hum ko kya

le le ke nam us ki jafaon ka 'mushafi'

hum aap jal rahe hain jalate ho hum ko kya