tum ghairat-e-nahid ho tum zohra-jabin ho

tum ġhairat-e-nāhīd ho tum zohra-jabīñ ho

tum ko nahīñ ma.alūm ki tum kitne hasīñ ho

ik umr se mushtāq-e-tajallī haiñ nigāheñ

āvāz to do mujh ko kahīñ ho ki nahīñ ho

is qurb meñ bhī buad kā miltā hai qarīna

kahte haiñ ki tum merī rag-e-jāñ ke qarīñ ho

takmīl-e-ibādat kā yahī raaz hai zāhid

vo naqsh-e-qadam bā.is-e-taz.īn-e-jabīñ ho

paḌh kar na sunā ham ko sitāroñ ke sahīfe

shāyad tirī mahfil meñ koī ḳhāk-nashīñ ho

jis moḌ pe bichhḌe the mohabbat ke musāfir

mumkin hai abhī qāfila-e-vaqt vahīñ ho

jo zabt kī tahvīl meñ rah jaa.e simaT kar

vo qatra-e-ḳhūñ kyoñ na mohabbat kā nagīñ ho

betāb-e-tamāsha hai jamāl-e-ruḳh-e-jānāñ

maujūd koī dekhne vaalā to kahīñ ho

kahtī haiñ 'tufail' ab ye bahāroñ kī havā.eñ

phūloñ kī tamanna hai to kāñToñ ke qarīñ ho

tum ghairat-e-nahid ho tum zohra-jabin ho

tum ko nahin malum ki tum kitne hasin ho

ek umr se mushtaq-e-tajalli hain nigahen

aawaz to do mujh ko kahin ho ki nahin ho

is qurb mein bhi buad ka milta hai qarina

kahte hain ki tum meri rag-e-jaan ke qarin ho

takmil-e-ibaadat ka yahi raaz hai zahid

wo naqsh-e-qadam bais-e-tazin-e-jabin ho

paDh kar na suna hum ko sitaron ke sahife

shayad teri mahfil mein koi KHak-nashin ho

jis moD pe bichhDe the mohabbat ke musafir

mumkin hai abhi qafila-e-waqt wahin ho

jo zabt ki tahwil mein rah jae simaT kar

wo qatra-e-KHun kyon na mohabbat ka nagin ho

betab-e-tamasha hai jamal-e-ruKH-e-jaanan

maujud koi dekhne wala to kahin ho

kahti hain 'tufail' ab ye bahaaron ki hawaen

phulon ki tamanna hai to kanTon ke qarin ho