tum hi nahin ho dushman-e-jaan aur bhi to hain

tum hī nahīñ ho dushman-e-jāñ aur bhī to haiñ

dil meñ hazār zaḳhm nihāñ aur bhī to haiñ

har chand rasm-o-rāh-e-mohabbat bhī hai zarūr

'ahmar' jahāñ meñ kār-e-jahāñ aur bhī to haiñ

kis dil se daad duuñ maiñ tire iltifāt kī

dil meñ jarāhatoñ ke nishāñ aur bhī to haiñ

ik ham hī kyoñ haiñ lā.eq-e-tāzīr nāsehā

āsūdagān-e-kū-e-butāñ aur bhī to haiñ

ik un ke iltifāt pe kuchh munhasir nahīñ

is rahguzar meñ sang-e-girāñ aur bhī to haiñ

takmīl-e-shauq-e-dīd agar ho ga.ī to kyā

andesha-hā-e-sūd-o-ziyāñ aur bhī to haiñ

'ahmar' bas ek tum hī nahīñ sīna-tāb-e-shauq

is anjuman meñ sho.ala-ba-jāñ aur bhī to haiñ

tum hi nahin ho dushman-e-jaan aur bhi to hain

dil mein hazar zaKHm nihan aur bhi to hain

har chand rasm-o-rah-e-mohabbat bhi hai zarur

'ahmar' jahan mein kar-e-jahan aur bhi to hain

kis dil se dad dun main tere iltifat ki

dil mein jarahaton ke nishan aur bhi to hain

ek hum hi kyon hain laeq-e-tazir naseha

aasudagan-e-ku-e-butan aur bhi to hain

ek un ke iltifat pe kuchh munhasir nahin

is rahguzar mein sang-e-giran aur bhi to hain

takmil-e-shauq-e-did agar ho gai to kya

andesha-ha-e-sud-o-ziyan aur bhi to hain

'ahmar' bas ek tum hi nahin sina-tab-e-shauq

is anjuman mein shoala-ba-jaan aur bhi to hain