tum ho ki mahtab hai hai pairahan mein kaun

tum ho ki māhtāb hai hai pairahan meñ kaun

dekho qabā baḌhā ke hai ujlā badan meñ kaun

dil meñ agar nahīñ hai ḳhayāl-e-lab-e-malīh

bhartā namak hai zaḳhm-e-jigar ke dahan meñ kaun

sayyād kā gumāñ thā ki aahaT nasīm kī

khaTke pe bulbuloñ ne pukārā chaman meñ kaun

shauq-e-fanā meñ ye hai vo mushtāq-e-qatl hai

aage chalegā dekhiye rūh-o-badan meñ kaun

shāna jhaTak jhaTak ke vo kahte haiñ baar baar

uljhā huā hai zulf-e-shikan-dar-shikan meñ kaun

bāhar nikal ke parde se hai qadr husn kī

yūsuf ko jāntā hī thā pahle vatan meñ kaun

dil hai na jaan hai na jigar hai na chārāgar

sach hai sharīk hotā hai ranj-o-mehan meñ kaun

haañ is taraf bhī ek nazar duur se sahī

baiThā hai o qarīb-e-adū anjuman meñ kaun

marnā qubūl josh-e-junūñ meñ mujhe magar

leTā rahegā murde kī sūrat kafan meñ kaun

ġhurbat meñ rahte rahte zamāna guzar gayā

'sho.ala' agar ga.e bhī milegā vatan meñ kaun

tum ho ki mahtab hai hai pairahan mein kaun

dekho qaba baDha ke hai ujla badan mein kaun

dil mein agar nahin hai KHayal-e-lab-e-malih

bharta namak hai zaKHm-e-jigar ke dahan mein kaun

sayyaad ka guman tha ki aahaT nasim ki

khaTke pe bulbulon ne pukara chaman mein kaun

shauq-e-fana mein ye hai wo mushtaq-e-qatl hai

aage chalega dekhiye ruh-o-badan mein kaun

shana jhaTak jhaTak ke wo kahte hain bar bar

uljha hua hai zulf-e-shikan-dar-shikan mein kaun

bahar nikal ke parde se hai qadr husn ki

yusuf ko jaanta hi tha pahle watan mein kaun

dil hai na jaan hai na jigar hai na chaaragar

sach hai sharik hota hai ranj-o-mehan mein kaun

han is taraf bhi ek nazar dur se sahi

baiTha hai o qarib-e-adu anjuman mein kaun

marna qubul josh-e-junun mein mujhe magar

leTa rahega murde ki surat kafan mein kaun

ghurbat mein rahte rahte zamana guzar gaya

'shoala' agar gae bhi milega watan mein kaun