tum ho taswir-e-wafa maine kab inkar kiya

tum ho tasvīr-e-vafā maiñ ne kab inkār kiyā

mujh se hotī hai ḳhatā maiñ ne kab inkār kiyā

aisā hotā hī nahīñ bismil-e-hasrat kā lahū

ye to hai rang-e-hinā maiñ ne kab inkār kiyā

har zamāne meñ rahī ahl-e-mohabbat ke liye

haañ yahī rasm-e-jafā maiñ ne kab inkār kiyā

ḳhanjar-e-abrū-e-ḳhamdār kī ḳhātir manzūr

merā hāzir hai galā maiñ ne kab inkār kiyā

maiñ ne tashkīk se paa.ī hai yaqīñ kī manzil

tū hai aalam kā ḳhudā maiñ ne kab inkār kiyā

jab jalānā tirī aadat hai to ai barq-e-tapāñ

aa nasheman bhī jalā maiñ ne kab inkār kiyā

pārsā.ī kī sanad kis ko mile kyā mālūm

sāqiyā jaam uThā maiñ ne kab inkār kiyā

ai ḳhudā hashr meñ har choT ko taaza kar de

aur purvā.ī chalā maiñ ne kab inkār kiyā

us kī chaukhaT pe jhukāyā hai jabīñ ko 'sīmā'

vo jazā de ki sazā maiñ ne kab inkār kiyā

tum ho taswir-e-wafa main ne kab inkar kiya

mujh se hoti hai KHata main ne kab inkar kiya

aisa hota hi nahin bismil-e-hasrat ka lahu

ye to hai rang-e-hina main ne kab inkar kiya

har zamane mein rahi ahl-e-mohabbat ke liye

han yahi rasm-e-jafa main ne kab inkar kiya

KHanjar-e-abru-e-KHamdar ki KHatir manzur

mera hazir hai gala main ne kab inkar kiya

main ne tashkik se pai hai yaqin ki manzil

tu hai aalam ka KHuda main ne kab inkar kiya

jab jalana teri aadat hai to ai barq-e-tapan

aa nasheman bhi jala main ne kab inkar kiya

parsai ki sanad kis ko mile kya malum

saqiya jam uTha main ne kab inkar kiya

ai KHuda hashr mein har choT ko taza kar de

aur purwai chala main ne kab inkar kiya

us ki chaukhaT pe jhukaya hai jabin ko 'sima'

wo jaza de ki saza main ne kab inkar kiya