tum kabhi mail-e-karam na hue

tum kabhī mā.il-e-karam na hue

merī qismat ke duur ġham na hue

ashk-rezī se ham hue be-dam

tere dāman ke taar nam na hue

ham ne taur-e-vafā nahīñ badlā

tere zulm-o-sitam bhī kam na hue

thak ga.e raah kī sa.ūbat se

mere sāthī mire qadam na hue

rāste meñ jo thak ke baiTh ga.e

zindagī-bhar vo tāza-dam na hue

multafit vo rahe zamāne par

morid-e-lutf ek ham na hue

jin kī ḳhātir 'hazīñ' uThā.e ġham

vo bhī apne sharīk-e-ġham na hue

tum kabhi mail-e-karam na hue

meri qismat ke dur gham na hue

ashk-rezi se hum hue be-dam

tere daman ke tar nam na hue

hum ne taur-e-wafa nahin badla

tere zulm-o-sitam bhi kam na hue

thak gae rah ki saubat se

mere sathi mere qadam na hue

raste mein jo thak ke baiTh gae

zindagi-bhar wo taza-dam na hue

multafit wo rahe zamane par

morid-e-lutf ek hum na hue

jin ki KHatir 'hazin' uThae gham

wo bhi apne sharik-e-gham na hue