tumko bas ehsan ginane hote hain

tum ko bas ehsān gināne hote haiñ

ham logoñ ko qarz chukāne hote haiñ

jhūTe hote haiñ jin logoñ ke sapne

un logoñ ke ek Thikāne hote haiñ

har rishte meñ kyā hotā hai sab ke saath

saath kisī ke saal bitāne hote haiñ

break-up ho to ek musībat ye bhī hai

tattō vaale naam miTāne hote haiñ

us laḌkī ko har thoḌe din meñ mujh ko

achchhe lamhe yaad dilāne hote haiñ

ik laḌkī kā dost banā to jaanā ye

us ke bhī apne afsāne hote haiñ

yaar sharāb pilāo thoḌī phir dekho

kaise apne yaar divāne hote haiñ

jin logoñ ke ġham meñ barkat hotī hai

un logoñ ke nam sir.hāne hote haiñ

niiñd se banjar lagtī haiñ jo do āñkheñ

un āñkhoñ meñ ḳhvāb suhāne hote haiñ

tum ko bas ehsan ginane hote hain

hum logon ko qarz chukane hote hain

jhuTe hote hain jin logon ke sapne

un logon ke ek Thikane hote hain

har rishte mein kya hota hai sab ke sath

sath kisi ke sal bitane hote hain

break-up ho to ek musibat ye bhi hai

tattoo wale nam miTane hote hain

us laDki ko har thoDe din mein mujh ko

achchhe lamhe yaad dilane hote hain

ek laDki ka dost bana to jaana ye

us ke bhi apne afsane hote hain

yar sharab pilao thoDi phir dekho

kaise apne yar diwane hote hain

jin logon ke gham mein barkat hoti hai

un logon ke nam sirhane hote hain

nind se banjar lagti hain jo do aankhen

un aankhon mein KHwab suhane hote hain