تم کو وفا سے کیا مطلب ہے جاؤ اپنا کام کرو

تم کو وفا سے کیا مطلب ہے جاؤ اپنا کام کرو

دن بھر بھٹکے آوارہ سے اب جا کر آرام کرو

کب روکا ہے میں نے تم کو میری باتیں کرنے سے

نام اگر ہوتا ہے تمہارا تو مجھ کو بدنام کرو

جانے والوں کو جانا ہے کب آتے ہیں لوٹ کے پھر

سر پھوڑو یادوں میں ان کی رو کے سحر سے شام کرو

کیا رکھا ہے اس کی اس کی تیری میری کرنے سے

خود سے ملیں گے بات بنے گی خود کو نہ یوں دشنام کرو

اہل خرد سے کچھ نہیں بنتا ہر جانب کہرام مچا

ایسا کرو سب ذہنوں میں اپنے دل رکھنے کا کام کرو