tumko ye hai agar yaqin dil mein wo jalwa-gar nahin

tum ko ye hai agar yaqīñ dil meñ vo jalva-gar nahīñ

DhūñDhā karo tamām umr milne kā umr-bhar nahīñ

aa.e na aa.e be-ḳhabar kyā tujhe ye ḳhabar nahīñ

saañs kā e'tibār kyā shaam hai to sahar nahīñ

dair ho ka.aba ho ki dil kis meñ vo jalva-gar nahīñ

dekh sakūñ magar use itnī mirī nazar nahīñ

kunj-e-qafas meñ andalīb muztar-o-bekas-o-ġharīb

kahne ko bāl-o-par to haiñ uḌne ko bāl-o-par nahīñ

dil meñ balā kā josh hai sar liye sarfarosh hai

jiine kā hosh hai kahāñ marne kā us ko Dar nahīñ

toḌ rahā hai aaj dam ġham meñ koī marīz-e-ġham

phir bhī haiñ aap be-ḳhabar aap ko kuchh ḳhabar nahīñ

jaan ga.e ye mar ke ham mulk-e-adam thā do-qadam

ḳhatm ho jald jo safar aisā koī safar nahīñ

parde meñ aap baiTh kar rakhte haiñ har taraf nazar

aur zabān par ye hai shoḳh mirī nazar nahīñ

lab pe hai nāra-e-alast jhuum rahā hai koī mast

chhā.ī hai aisī be-ḳhudī apnī use ḳhabar nahīñ

uf ye mirā nasīb-e-bad jā ke banī kahāñ lahad

sab kī hai rahguzar jahāñ aap kī rahguzar nahīñ

baat ye tum ne sach kahī 'bismil' be-hunar sahī

ye bhī hai ik baḌā hunar is meñ koī hunar nahīñ

tum ko ye hai agar yaqin dil mein wo jalwa-gar nahin

DhunDha karo tamam umr milne ka umr-bhar nahin

aae na aae be-KHabar kya tujhe ye KHabar nahin

sans ka e'tibar kya sham hai to sahar nahin

dair ho kaba ho ki dil kis mein wo jalwa-gar nahin

dekh sakun magar use itni meri nazar nahin

kunj-e-qafas mein andalib muztar-o-bekas-o-gharib

kahne ko baal-o-par to hain uDne ko baal-o-par nahin

dil mein bala ka josh hai sar liye sarfarosh hai

jine ka hosh hai kahan marne ka us ko Dar nahin

toD raha hai aaj dam gham mein koi mariz-e-gham

phir bhi hain aap be-KHabar aap ko kuchh KHabar nahin

jaan gae ye mar ke hum mulk-e-adam tha do-qadam

KHatm ho jald jo safar aisa koi safar nahin

parde mein aap baiTh kar rakhte hain har taraf nazar

aur zaban par ye hai shoKH meri nazar nahin

lab pe hai nara-e-alast jhum raha hai koi mast

chhai hai aisi be-KHudi apni use KHabar nahin

uf ye mera nasib-e-bad ja ke bani kahan lahad

sab ki hai rahguzar jahan aap ki rahguzar nahin

baat ye tum ne sach kahi 'bismil' be-hunar sahi

ye bhi hai ek baDa hunar is mein koi hunar nahin