tumko ye lag raha tha ki pichha karenge hum

tum ko ye lag rahā thā ki pīchhā kareñge ham

yā'nī ki 'ishq tum se dubāra kareñge ham

vo bār-e-zīst ho yā judā.ī tirī sanam

hargiz ḳhudā ke ghar meñ na shikva kareñge ham

bachchoñ kī fees maañ ki davāoñ kā farz bhī

itnī sī ik kamā.ī meñ kyā kyā kareñge ham

kyā kyā mirī ḳhatā.eñ thiiñ kyoñ vo judā huā

pahroñ yahī firāq meñ sochā kareñge ham

ye 'ishq dūsrā hai so lāzim hai ehtiyāt

yā'nī qadam sañbhāl ke rakkhā kareñge ham

anjām jānte haiñ ki sahrā hai jab 'asar'

kār-e-jahāñ meñ vaqt na zaa.e' kareñge ham

tum ko ye lag raha tha ki pichha karenge hum

ya'ni ki 'ishq tum se dubara karenge hum

wo bar-e-zist ho ya judai teri sanam

hargiz KHuda ke ghar mein na shikwa karenge hum

bachchon ki fees man ki dawaon ka farz bhi

itni si ek kamai mein kya kya karenge hum

kya kya meri KHataen thin kyon wo juda hua

pahron yahi firaq mein socha karenge hum

ye 'ishq dusra hai so lazim hai ehtiyat

ya'ni qadam sanbhaal ke rakkha karenge hum

anjam jaante hain ki sahra hai jab 'asar'

kar-e-jahan mein waqt na zae' karenge hum