tum na aao to nama-bar hi sahi

tum na aao to nāma-bar hī sahī

mubtadā ho na ho ḳhabar hī sahī

is ke saa.e meñ dam to letā huuñ

shāḳh-e-ummīd be-samar hī sahī

dil kī niklī to hai bhaḌās zarā

aah be-gāna-e-asar hī sahī

aur to aap se na kuchh hogā

mehrbānī kī ik nazar hī sahī

chhoḌ vaa.iz riyā ko jaam uThā

ḳhair mumkin nahīñ to shar hī sahī

ek muddat se sun rahā hai jahāñ

dāstāñ merī muḳhtasar hī sahī

kyuuñ hai nā-mo'tabar karam un kā

zindagī dard-e-mo'atabar hī sahī

nūr-afzā hai yād-e-chehra-e-dost

raat furqat kī be-sahar hī sahī

hai yahī merā kāba-e-maqsūd

sajda karne ko terā dar hī sahī

roz minnat-kash-e-davā to na ho

zindagī ek dard-e-sar hī sahī

kuchh tumheñ bhī to rahm lāzim hai

merī fariyād be-asar hī sahī

'arsh' be-gāna-e-hunar to na rah

aib karne kā ik hunar hī sahī

tum na aao to nama-bar hi sahi

mubtada ho na ho KHabar hi sahi

is ke sae mein dam to leta hun

shaKH-e-ummid be-samar hi sahi

dil ki nikli to hai bhaDas zara

aah be-gana-e-asar hi sahi

aur to aap se na kuchh hoga

mehrbani ki ek nazar hi sahi

chhoD waiz riya ko jam uTha

KHair mumkin nahin to shar hi sahi

ek muddat se sun raha hai jahan

dastan meri muKHtasar hi sahi

kyun hai na-mo'tabar karam un ka

zindagi dard-e-mo'atabar hi sahi

nur-afza hai yaad-e-chehra-e-dost

raat furqat ki be-sahar hi sahi

hai yahi mera kaba-e-maqsud

sajda karne ko tera dar hi sahi

roz minnat-kash-e-dawa to na ho

zindagi ek dard-e-sar hi sahi

kuchh tumhein bhi to rahm lazim hai

meri fariyaad be-asar hi sahi

'arsh' be-gana-e-hunar to na rah

aib karne ka ek hunar hi sahi