tum nahin ho sath to sara jahan tanha lage

tum nahīñ ho saath to saarā jahāñ tanhā lage

ye zamīñ tanhā lage ye āsmāñ tanhā lage

jab se dil ko aa gayā tere na aane kā yaqīñ

hasratoñ kī bhiiḌ meñ ab ye makāñ tanhā lage

kaun jaane vahshat-e-dil ko hai kis kā intizār

haiñ hazāroñ phuul phir bhī gulsitāñ tanhā lage

shukr hai dard-e-mohabbat raas mujh ko aa gayā

zindagī kā ab koī lamha kahāñ tanhā lage

donoñ jānib ek hī manzar hai furqat meñ ayaañ

maiñ faqat tanhā nahīñ vo bhī vahāñ tanhā lage

ittihād-e-bāhamī jab se nahīñ hai ai 'mayank'

kārvāñ ke saath mīr-e-kārvāñ tanhā lage

tum nahin ho sath to sara jahan tanha lage

ye zamin tanha lage ye aasman tanha lage

jab se dil ko aa gaya tere na aane ka yaqin

hasraton ki bhiD mein ab ye makan tanha lage

kaun jaane wahshat-e-dil ko hai kis ka intizar

hain hazaron phul phir bhi gulsitan tanha lage

shukr hai dard-e-mohabbat ras mujh ko aa gaya

zindagi ka ab koi lamha kahan tanha lage

donon jaanib ek hi manzar hai furqat mein ayan

main faqat tanha nahin wo bhi wahan tanha lage

ittihad-e-bahami jab se nahin hai ai 'mayank'

karwan ke sath mir-e-karwan tanha lage