tum nahin jaante wafa kya hai

tum nahīñ jānte vafā kyā hai

dard-e-dil ke liye davā kyā hai

jo jafākār hī rahe har dam

vo nahīñ jānte jafā kyā hai

shauq-e-dīdār hī rahā har dam

is jahāñ meñ magar milā kyā hai

har taraf rang hai fareb-e-nazar

jalva-gar us kī ye adā kyā hai

zindagī qaid-o-band hai shāyad

zindagī gar ye hai sazā kyā hai

ruuTh kar chal ga.e jahāñ se vo

zindagī tujh meñ ab dharā kyā hai

saare gulshan fasurda-sāmāñ haiñ

ġhunche ġhunche ko ab huā kyā hai

zindagī tujh se maiñ ne sīkhā hai

aarzū kyā hai mudda.ā kyā hai

tajrabe se huā hai ab ma.alūm

dahr kyā chiiz hai ḳhudā kyā hai

umr āḳhir ko aa ga.ī 'tashna'

jā tū ab bazm meñ rakhā kyā hai

tum nahin jaante wafa kya hai

dard-e-dil ke liye dawa kya hai

jo jafakar hi rahe har dam

wo nahin jaante jafa kya hai

shauq-e-didar hi raha har dam

is jahan mein magar mila kya hai

har taraf rang hai fareb-e-nazar

jalwa-gar us ki ye ada kya hai

zindagi qaid-o-band hai shayad

zindagi gar ye hai saza kya hai

ruTh kar chal gae jahan se wo

zindagi tujh mein ab dhara kya hai

sare gulshan fasurda-saman hain

ghunche ghunche ko ab hua kya hai

zindagi tujh se main ne sikha hai

aarzu kya hai muddaa kya hai

tajrabe se hua hai ab malum

dahr kya chiz hai KHuda kya hai

umr aaKHir ko aa gai 'tashna'

ja tu ab bazm mein rakha kya hai