tumne jab mujhse bichhaDne ki tamanna ki thi

tum ne jab mujh se bichhaḌne kī tamanna kī thī

maiñ ne tūfān se laḌne kī tamanna kī thī

āñdhiyāñ mere daraḳhtoñ ko girāne aa.iiñ

maiñ ne bhī dhuup se laḌne kī tamanna kī thī

phuul ko us se kudūrat hai to bas is liye hai

us ne titlī ko pakaḌne kī tamanna kī thī

baaġh ke peḌoñ kī is rūkhī tabī.at ke sabab

sabz pattoñ ne bhī jhaḌne kī tamanna kī thī

ghaas ko terī nazākat kā koī ilm na thā

bas tire paañv meñ paḌne kī tamanna kī thī

maiñ ne ik roz ḳhudāoñ kā takabbur toḌā

aur ḳhudā.ī ne akaḌne kī tamanna kī thī

mo'atabar Thahre mire des meñ jab be-hunare

maiñ ne us vaqt bigaḌne kī tamanna kī thī

usī parvāne ke dushman haiñ bahut se afrād

jis ne ik sham.a jakaḌne kī tamanna kī thī

aql ko maiñ ne kahīñ siine meñ girvī rakh kar

saarī duniyā ke ujaḌne kī tamanna kī thī

aap kahte haiñ to ḳhāmosh hī rahte haiñ ham

par ta.alluq ne jhagaḌne kī tamanna kī thī

baiza-e-chashm meñ ik roz samāne ke liye

puurī duniyā ne sukaḌne kī tamanna kī thī

tum ne jab mujh se bichhaDne ki tamanna ki thi

main ne tufan se laDne ki tamanna ki thi

aandhiyan mere daraKHton ko girane aain

main ne bhi dhup se laDne ki tamanna ki thi

phul ko us se kudurat hai to bas is liye hai

us ne titli ko pakaDne ki tamanna ki thi

bagh ke peDon ki is rukhi tabiat ke sabab

sabz patton ne bhi jhaDne ki tamanna ki thi

ghas ko teri nazakat ka koi ilm na tha

bas tere panw mein paDne ki tamanna ki thi

main ne ek roz KHudaon ka takabbur toDa

aur KHudai ne akaDne ki tamanna ki thi

mo'atabar Thahre mere des mein jab be-hunare

main ne us waqt bigaDne ki tamanna ki thi

usi parwane ke dushman hain bahut se afrad

jis ne ek shama jakaDne ki tamanna ki thi

aql ko main ne kahin sine mein girwi rakh kar

sari duniya ke ujaDne ki tamanna ki thi

aap kahte hain to KHamosh hi rahte hain hum

par talluq ne jhagaDne ki tamanna ki thi

baiza-e-chashm mein ek roz samane ke liye

puri duniya ne sukaDne ki tamanna ki thi