tumne jo kiya pesh wo gul-dan bahut hai

tum ne jo kiyā pesh vo gul-dān bahut hai

ye rasm-o-rah-e-ḳhās mirī jaan bahut hai

anjān huā jaatā huuñ maiñ kis liye ḳhud se

shāyad ki mirī shahr meñ pahchān bahut hai

hushiyār hai jo chiiz muqayyad hai vo sar meñ

āzād hai jo siine meñ nādān bahut hai

dil ko maiñ hirāsat se tirī kaise chhuḌā.ūñ

matlūb hai jo mujh se vo tāvān bahut hai

kis ḳhushk ilāqe pe paḌī hai nazar us kī

kyā baat hai jo abr pareshān bahut hai

mushkil hai bahut aa.ine meñ dekhnā ḳhud ko

maiñ to ye samajhtā thā ki āsān bahut hai

ustād-e-suḳhan kī nahīñ ai 'badr' zarūrat

ho sāmne jo 'mīr' kā dīvān bahut hai

tum ne jo kiya pesh wo gul-dan bahut hai

ye rasm-o-rah-e-KHas meri jaan bahut hai

anjaan hua jata hun main kis liye KHud se

shayad ki meri shahr mein pahchan bahut hai

hushiyar hai jo chiz muqayyad hai wo sar mein

aazad hai jo sine mein nadan bahut hai

dil ko main hirasat se teri kaise chhuDaun

matlub hai jo mujh se wo tawan bahut hai

kis KHushk ilaqe pe paDi hai nazar us ki

kya baat hai jo abr pareshan bahut hai

mushkil hai bahut aaine mein dekhna KHud ko

main to ye samajhta tha ki aasan bahut hai

ustad-e-suKHan ki nahin ai 'badr' zarurat

ho samne jo 'mir' ka diwan bahut hai