tumne jo qurbaton mein ye rakkha hai fasla

tum ne jo qurbatoñ meñ ye rakkhā hai fāsla

kuchh der kā agar hai to achchhā hai fāsla

ḳhud se mile hue hameñ arsa guzar gayā

ham ne bahut qarīb se dekhā hai fāsla

badle haiñ ishq ne bhī azal se hazār rang

koshish ho qurbatoñ kī to baḌhtā hai fāsla

do hī sabab haiñ girya ke tum se haiñ munsalik

pahlā tumhārā rabt hai duujā hai fāsla

jab se mile haiñ tum se isī kashmakash meñ haiñ

dhokā ye qurbateñ haiñ yā dhokā hai fāsla

bistar ke ek chhor pe tum ho aur ik pe maiñ

kam dikh rahā hai par baḌā lambā hai fāsla

ye zindagī tabhī to dikhātī hai apne rang

jab jab hamāre biich meñ ghaTtā hai fāsla

dikhtā hai us kā aks hī har shakl meñ mujhe

us ne ajiib Dhang se bartā hai fāsla

tum ne jo qurbaton mein ye rakkha hai fasla

kuchh der ka agar hai to achchha hai fasla

KHud se mile hue hamein arsa guzar gaya

hum ne bahut qarib se dekha hai fasla

badle hain ishq ne bhi azal se hazar rang

koshish ho qurbaton ki to baDhta hai fasla

do hi sabab hain girya ke tum se hain munsalik

pahla tumhaara rabt hai duja hai fasla

jab se mile hain tum se isi kashmakash mein hain

dhoka ye qurbaten hain ya dhoka hai fasla

bistar ke ek chhor pe tum ho aur ek pe main

kam dikh raha hai par baDa lamba hai fasla

ye zindagi tabhi to dikhati hai apne rang

jab jab hamare bich mein ghaTta hai fasla

dikhta hai us ka aks hi har shakl mein mujhe

us ne ajib Dhang se barta hai fasla